Dagaal culus ayaa saaka ka qaraxay inta u dhexeysa deegaanada Harboole iyo deegaanka Janaa-cabdalle, waxaana dagaalka soo qaaday Ciidamada huwanta oo weerar sadex geesood ah ku soo qaaday meel ay isku aruursanayeen Maleeshiyaadka kooxda Al-Shabaab.
Dagaalka oo u dhexeeya ciidamada dowladda federaalka ee Soomaaliya, kuwa Raaskambooni iyo militariga Kenya oo isku dhinac ah iyo maleeshiyada Al-Shabaab ayaa ka dambeeyay kaddib markii ciidamada huwanta ay weerar ku qaadeen deegaanka Janaa-cabdalle, iyadoo ay iska hor-imaad kala kulmeen maleeshiyada Al-Shabaab.
Khasaaraha dagaalka ka dhashay ilaa hadda ma cadda, qof goobjooge ah oo ku sugan Janaa-cabdalle ayaa sheegay in dhawaqa rasaasta ay maqlayaan, dagaalkuna uu culus yahay.
Dagaalka ayaa daba socda iska hor-imaadyo toddobaadyadii ugu dambeeyey ka dhacayay gobolka Jubbada hoose oo salka ku haya qabsashada magaalada dekedda leh ee Kismaayo.
Daafeet.Com