Dagaal ayaa maanta wuxuu ku dhex maray deegaanka Cabdi Dhoorre oo 20 km galbeed kaga beegan magaalada Kismaayo ee xarunta gobolka Jubbada Hoose dad xoolo dhaqato ah iyo maleeshiyo ka tirsan al-Shabaab.
Dagaalka ayaa dhacay kaddib markii maleeshiyada al-Shabaab ay si khasab ah xoolo uga qaadatay xoolo-dhaqatada, sida ay sheegeen dad ka tirsan deegaanka.
Khasaare isugu jira dhimasho iyo dhaawac ayaa lagu soo warramayaa inuu soo gaaray dhinacyada dagaallamay, balse si rasmi ah looma xaqiijin karo inta uu gaarsiisan yahay khasaaraha.
Lama oga in xoolo-dhaqatada ay taageero ka heleen ciidanka dowladda iyo kuwa Kenya ee ku sugan magaalada Kismaayo.
Al-Shabaab ayaa horey ugu amartay xoolo-dhaqatada inay ku taageeraan xoolo nool maleeshiyada dagaalka kula jirta dowladda federaalka Soomaaliya iyo ciidamada taageeraya.
Daafeet.Com