Kumannaan qof ayaa maanta isugu baxay waddooyinka magaalada Garoowe ee xarunta maamulka Puntland, kuwaas oo dhigayay bananbax looga soo horjeedo maleeshiyada al-Shabaab.
Bananbaxayaasha, oo isugu jiray haween, carruur, arday, culumaa’ddiin, dhallinyaro ayaa ku dhawaaqayay hal-ku-dhegyo ay ku dhaleeceynayeen kooxda al-Shabaab.
Waxaa sidoo kale bananbaxa ka qeyb-galay mas’uuliyiinta maamulka Puntland oo uu horkacayay madaxweyne Cabdiraxmaan Sheekh Maxamed Maxamuud Faroole.
Bananbaxayaasha ayaa ku dhawaaqayay erayo ay ku taageerayeen maamulkooda, ugana soo horjeedeen dilka culumaa’uddiinka.
bananbaxan oo ay soo qabanqaabiyeen ururrada bulshada, ardayda dugsiyada iyo culumaa’uddiin ayaa qaar ka mid ah dadkii ka qeyb-galay waxay aad uga xumaayeen tallaabada kooxda al-Shabaab ay ku dishay Sheekh Cabdiqaadir Nuur Faarax.
Sheekh Cabdiqaadir Nuur Faarax waxaa February 15 lagu dhex dilay masaajid ku yaalla magaalada Garoowe xilli uu ku jiray salaadda Casar.
Daafeet.Com