Wararka aynu ka helney gobolka Baay ayaa sheegaya in maleeshiyada al-Shabaab ay dib ula wareegtay deegaanka Awdiinle oo 30 km galbeed ka jira magaalada Baydhabo ee xarunta gobolka Baay kaddib labo maalmood oo dagaal dhimasho iyo dhaawac sababay uu halkaas ku dhex maray ciidanka dowladda Soomaaliya iyo maleeshiyada al-Shabaab.
Mid ka mid ah saraakiisha hoggaamineysa ciidanka dowladda ee lagala wareegay deegaanka Awdiinle ayaa xaqiijiyay inay isaga baxeen Awdiinle kaddib markii al-Shabaab ay weerar ku soo qaadday deegaanka.
Dad tiradoodu ay gaareyso toban qof oo u badan dhinacyadii dagaallamay ayaa ku dhintay dagaalka, waxaana la sheegayaa inuu dagaalka ku fiday deegaanno kale oo u dhaxeeya Awdiinle iyo magaalada Baydhabo ee xarunta gobolka Baay.
Sabtidii ayay ahayd markii ciidanka dowladda Soomaaliya ay kala wareegeen kooxda al-Shabaab gacan ku haynta deegaanka Awdiinle kaddib dagaal dhex maray labada dhinac oo ay ku dhinteen saddex qof.
Daafeet.Com