Dagaal shaley gelinkii dambe ka dhacay Degmada Afmadow ee gobolka Jubada Hoose kaasoo ey ku dagaalameen Alshaba iyo Raskambooni ayaa waxaa guulo kala sheegtey kooxihii halkaasi ku dagaalamey.
Waxaa ilaa iyo imnka aan la sheegi karin khasaaraha ka dhashay dagaalkaas balse warar ka madaxbannaan labada dhinac waxay sheegayaan inay ku dhinteen in ka badan 12-qof oo labada dhinac ah tiro intaas ka badanna ay ku dhaawacmeen.
Afhayeenka howgallada ee Al-shabaab, Sheekh C/casiis Abuu-Muscab ayaa sheegay in xoogaggooda ay u suuro gashay inay gudaha u galaan degmada ayna markii dambe si iskood ah uga baxeen.
Sidoo kale, wuxuu sheegay inay khasaare nafeed oo kala duwan u geysteen ciidamadii halkaas ku sugnaa, ayna gellinkii dambe go’aansadeen inay si iskood ah uga baxaan degmada, isagoo aan sheegin khasaare dhankooda soo gaartay.
Dhanka kale, afhayeenka kooxda Raaskambooni, C/naasir Seeraar Maax oo isaguna ka hadlay dagaalka ayaa xaqiijiyay in xoogagga Al-shabaab ay gudaha u galeen degmada, balse aysan qabsal saldhigga isagoo xusay inay markii dambe xoog kaga saareen degmada Afmadow.
Daafeet.Com