Guddoomiyaha baarlamaanka Soomaaliya, Prof. Maxamed Sheekh Cismaan Jawaari iyo xildhibaanno ayaa xalay hoygiisa ku booqday madaxweynihii hore ee Soomaaliya, Sheekh Shariif Sheekh Axmed.
Jawaari oo ka hadlay markii uu Sheekh Shariif kusoo dhaweeyay gurigiisa ayaa yiri: “Runtii waxaa sharaf iyo farxad inoo ah inaan gurigaaga kugu soo booqanay madaxweyne Sheekh Shariif annagoo Soomaaliya ka qabannay halkii aad soo gaarsiisay, inaan soo booqano aniga iyo xildhibaannadaba farxad ayay maanta inoo tahay. Waxaanse Alle ka rajeynaynaa in annagana uusan howshaas nagu ceebeyn oo halka aynu hiigsaneyno gaarsiino.”
Madaxweynihii hore oo isaguna ka hadlay goobta ayaa sheegay inuu aad ugu faraxsan yahay booqashada ay ugu yimaadeen guddoomiyaha baarlamaanka iyo xildhibaannada; wuxuuna xusay inuu horey u arki jiray mas’uul marka uu xilka ka dago la eedeeyo ama la af-la-gaadeeyo; laakiinse ay tahay dhaqan cusub in madax xil haysa ay soo booqdaan mas’uul xukunka uga horreeyay taasna uu aad u bogaadinayo.
Dhinaca kale, Sheekh Shariif ayaa uga tacsiyadeeyay xildhibaannadii ay kasoo gaareen dhaawacyada weerarkii 24-kii bishii hore ay Al-shabaab ku qaadday dhismaha xarunta baarlamaanka Soomaaliya iyo ammaantii ay mudnaayeen ciidammadii geesiyaasha ahaa ee weerarkaas ka hortagay, sidoo kalena wuxuu aad u bogaadiyay qaabka ay u shaqeeyaan xildhibaannada baarlamaanka isagoo si gaar ahna u xusay guddoonka baarlamaanka.
Daafeet.Com