Xukuumadda dalka Kenya ayaa sheegtay in 29-qof ay ku dhinteen weerarradii xalay ka dhacay deegaanno ku yaalla xeebta Kenya ayna tiro intaas ka badan ku dhaawacmeen.
Wasiirka arrimaha gudaha ee Kenya Joseph Ole Lenku oo isaguna saxaafadda dalka Kenya la hadlay ayaa sheegay in tirada guud ee dhimashada ay marayso 29-qof, sidoo kalena ay jiraan dhaawacyo fara badan oo la dhigay isbitaallada deegaannada ay weerarradu ka dhaceen.
Sidoo kale, wararka ayaa waxay sheegayaan in kooxaha hubeysan ay dilaan dad ku daawanayay filim deegaanka Hindida, sidoo kalena ay gaadiid ku gubeen saldhigga Gamba, ayna dab qabadsiiyeen dhismayaal halkaas ku yaallay.
Xarakada Al-shabaab ayaa sheegatay weerarrada, iyadoo afhayeenkooda dhinaca howgallada uu sheegay inay tiro dad ah ku dileen weerarradan, welina lama sheegin halka ay u baxsadeen kooxihii weerarradaas geystay iyo khasaare la gaarsiiyay.
Daafeet.Com