Dagaal culus ayaa la sheegayaa in saaka aroortii uu ka dhacay dhulkii safaaradii hore ee Mareykanka oo tan iyo wixii ka danbeeyay bur burkii dowladda dhexe ay deegaansadeen qoysas Soomaaliyeed.
Rasaas culus oo ay isweydaarsanayaan dhinacyada dagaalamaya ayaa laga maqlayaa inta badan xaafaddaha magaalada Muqdisho, iyadoo marar badan oo hore sidan oo kale dagaallo dhimasho iyo dhawacba sababay horay uga dhaceen deegaanka oo dadku inta badan u garanayaan Siliga Ameerican-ka.
Dagaalkan ayaa la sheegayaa inuu ka dhashay guryo la sheegay in la bur burinayay, waxaana saakay ciidamo hubeysan oo wata gaadiidka dagaalka tageen xaafado kuyaala meel ku dhaw Siligga Ameerikaanka.
Ciidamada halkaa tagay ayaa la sheegayaa iney bilaabeen iney burburiyaan qeybo ka mid ah guryihii halkaa ku yaala taasoo keentay in iska horimaad culus ay kala hortagaan ciidamo kale oo ka tirsan kuwa dowladda iyo maleeshiyaad hubeysan oo ka tirsan dadka deegaanka.
Xaafadan uu dagaalku ka socdo ayaa u badan guryo Jiingado ka sameysan oo u nugul rasaasta ay labada dhinac is weydaarsanayaan.