Dagaal khasaaro isugu jira dhimasho iyo dhaawac ah ayaa waxaa uu xalay ka dhacay Xaafadaha Tarabuush iyo Kaawa Godeey oo ka tirsan degmada wadajir ee Gobolkan Banaadir.
Dagaalka ayaa yimid, kadib markii Hobiyeyaal la sheegay in laga soo tuuray Aaga Xaafada Tarabuush laguna weeraray Xerada Xalane ay kusoo baxeen Ciidamo Boolis ah, isla markaana,iyaga oo wada howlgal ay iska horyimaadeen rag ka tirsan ciidamada Millateriga sidaasina uu dagaalka ku bilaawdey.
Goobjoogayaal halkaasi ku sugnaa ayaa warbaahinta u shaagay in dagaalka uu socday in ka badan Saacad,isla markaana ilaa iyo hadda inta la ogyahay ay ku geeriyoodeen Afar Ruux oo dhinacyada dagaalamay ah iyo qof Shacab ah halka ay ku dhaawacmeen Saddex ruux oo qaarkood ay Guryahooda ugu tagtay rasaasta.
Wararka qaar ee la helayo ayaa waxaa ay sheegayeen in dagaalka uu qeyb ka ahaa Sarkaal Caanka ah degmada wadajir oo Magaciisa lagu sheegay Bille-Afdheere,isla markaana Ciidamada Booliska ay Hoygiisa ka sameeyeen howlgal baariaano ah.
Wararka ayaa waxaa ay intaasi ku darayaan in markii hore uu dagaalka ka bilaawday Aaga Xaafada tarabuush,hayeeshee uu ku fiday ilaa Xaafada Kaawa Godeey qeybta degmada Wadajir,waxaana dadka xaafadahaas ay sheegeen in hubka cul culus la isku adeegsanayay.