Ciidamada Ilaalada Dugsiga tababarka Turkey Som ayaa toogasho ku dilay dhagarqabe doonayay in uu isku qarxiyo dhallinyaro arday ah oo doonayay in ay ku biiraan ciidamada Xoogga dalka Soomaaliyeed.
Taliyaha ciiddanka xoogga dalka, General Odowaa Yuusuf Raage, ayaa u sheegay warbaahinta dowladda in ilaalada amniga ay toogteen ninka ismiidaamiyay oo isku dayayay inuu galo xarunta milateriga.
Wuxuu intaas ku daray inaysan jirin askar Soomaali ah ama muwaadiniin Turki ah oo lagu dilay ama ku dhaawacmay weerarka.
Ilaa iyo hada ma jirto cid sheegatey mas’uuliyadda weerarka, laakiin kooxda al-Shabaab ayaa inta badan dalka ka fulisa weerarada noocan oo kale ah.