Qaraxaan oo jugtiisa laga maqlay degmooyin ka tirsan gobolka Banaadir ayaa waxaa uu goordhow ka dhacay Agagaarka Masaajidka Turkiga ay dhiseen oo ku yaalla wadada u dhaxeysa Isgoyska Fagax & Xaafada Jamhuuriya ee degmada Kaaraan.
Goobjoogayaal ayaa waxaa ay sheegeen in qaraxa uu ahaa miino nooca dhulka lagu Aaso, isla markaana lala eegtay Ciidamo ka tirsan kuwa AMIOSM oo marayay agagaarka Masjidka Turkiga, kuwaas oo kusii jeeday qeybo kamid ah degmada Hurwaa.
Mas’uuliyiin ka tirsan gaadiidka gurmadka deg dega ee Aamin Ambulance ayaa waxaa ay sheegeen in inta ay xaqiijiyeen 5 ruux ay ku geeriyootay 9 kalena ay ku dhaawacmeen rasaasta ay fureen Ciidamada AMISOM qarax kadib, dadkaas oo u badan kuwo degan meel u dhow halka qaraxa uu ka dhacay.
In ka badan labada Saacadood ayaa waxaa hakad galay isku socodka dadka iyo gaadiidka, kadib markii ay Ciidamada AMISOM joojiyeen, hayeeshee markii dambe ay dib u fureen, iyaga oo socdaalkodii iska sii watay.