Mohamed El-Amine Souef, oo ah ergeyga gaarka ah ee guddoomiyaha guddiga Midowga Afrika ee Soomaaliya, ayaa shaaca ka qaaday tirada khasaaraha inta lagu guda jiray wareysi uu siiyay VOA-da.
Souef wuxuu xaqiijiyay in lagu qiyaasay dhimashada askarta ciidanka midowga Afrika 3,500. Wuxuu sheegay in qasaaraha ugu badan uu soo gaaray ciidamada Burundi iyo Uganda.
Waa markii ugu horeysay oo sarkaal ka tirsan Midowga Afrika uu si cad uga hadlo khasaaraha guud ee ciidamada nabad ilaalinta ee ka howlgala Soomaaliya.
Souef, wasiirkii hore ee arrimaha dibadda ee Comoros, ayaa sheegay in uu mudnaanta siin doono qoysaska askarta lagu dilay Soomaaliya si ay magdhow u helaan qoysaskooda.
Waxa uu sheegay in ciidamadaasi ay sabab wanaagsan u yimaadeen Soomaaliya, maadaama dalalka ay ciidamada ku deeqeen ay dareemayaan in Soomaaliya ay ku dhow yihiin.
Dowladda Soomaaliya ayaa sidoo kale amaantay naf-hurnimada ciidamada nabad ilaalinta Midowga Afrika.